Azərbaycan İpoteka Fondunun Mətbuat xidməti bildirir ki, 2009-cu ilin iyul ayının 10 günü ərzində daha  60 nəfərə ipoteka krediti verilmişdir. Beləliklə, 1 iyun 2009-cu ildən bəri ölkədə 80 nəfər 3,6 mln.manat məbləğində ipoteka krediti almışdır.

Ümumiyyətlə, ipoteka kreditləşməsi bərpa olunduqdan sonra müvəkkil kredit təşkilatları tərəfindən 900-ə yaxın vətəndaşın müraciəti qəbul olunmuşdur. Bu müraciətlər üzrə kredit məbləğinin ümumi həcmi 40 mln.manata yaxındır.

Qeyd etmək lazımdır ki, güzəştli ipoteka kreditlərinin verilməsinin bərpasından 1 aydan da az vaxt keçməsinə baxmayaraq bu növ kredit almaq istəyən 100-ə yaxın vətəndaşın rəsmi müraciəti banklara daxil olmuşdur. Güzəştli ipoteka üzrə daxil olmuş müraciətlərin ümumi həcmi 3 mln. manatdan çox olmuşdur.

Əvvəlcədən də proqnozlaşdırıldığı kimi, ölkədə ipoteka kreditləşməsi prosesi tədricən intensivləşir və növbəti həftələrdə bu prosesin daha da sürətlənəcəyi ehtimal olunur.